Siglir tar il cuntegn

Header

cuntegn

Elecziuns 2019 La Partida verd-liberala

U ch’ins stat en per l’ambient u ch’ins stat en per l’economia, omadus na giaja betg crain blers. Betg ils verd-liberals. Tendenzas politicas che auters san nunpussaivel s’imaginar da metter sut ina chapella, reunescha questa partida senza problems.

Ella exista pir dapi 12 onns, la Partida verd-liberala svizra. L'istorgia dals sezs ch’ella ha recaltgà en il parlament a Berna sa resplenda er in zichelin en il Grischun. L'onn 2011 ha la partida gì ses pli grond success sin palancà naziunal e conquistà 12 sezs en la chombra gronda.

In da quels sezs ha gudagnà Josias Gasser, l'interprendider da Haldenstein. Sia glista aveva fatg en il Grischun atgnamain mo 8% da las vuschs. Grazia a la colliaziun da glistas cun la sanestra e perquai che tschellas partidas n'han betg unì lur glistas èn las vuschs burgaisas stadas sparpagliadas ed i ha tanschì per Josias Gasser, ch’è enconuschent en il Grischun sco piunier d’energia da vent.

Gia las proximas elecziuns, il 2015, èsi lura però stà a fin cun il mandat verd-liberal grischun. Las partidas burgaisas dal center han fatg patg e collià las glistas. Malgrà ch’ils verd-liberals èn vegnids sin circa tuttina bleras vuschs sco il 2011 è Josias Gasser dà ord il Cussegl naziunal.

Josias Gasser emprova anc ina giada

Ma el na ceda betg e candidescha quest onn puspè. Ils verd-liberals van en il cumbat cun duas glistas. Sin la glista giuvna candidescha tranter auter era Géraldine Danuser. La studenta da giurisprudenza da 24 onns batta gist era per in dals dus sezs grischuns en la chombra pitschna.

La situaziun è uss in zichel auter ch'avant otg onns, cura che la Partida verd-liberala profità da l’effect da Fukushima. Jon Carl Rauch, anteriur president communal da Sent, pur e magister pensa dentant ch’els pon uss puspè profitar dal tema clima ch’è il tema principal èn las elecziuns naziunalas. Jon Carl Rauch è sesì sin la sutga chauda ed ha respundì a dumondas davart il cumbat electoral da la PVL.

Il clima è noss tema principal, na be ussa, mabain gia daditg.
Autur: Jon Carl Rauch

Per pudair reconquistar il sez da Josias Gasser en il Cussegl naziunal ston els dentant far bler dapli vuschs.

Jau engulass pli gugent il sez da Magdalena Martullo-Blocher.
Autur: Jon Carl Rauch

Martullo-Blocher fa uss reclama ch’ella haja reducì bler CO2 en la Ems-Chemie cun l’ovra da Biomassa. Tenor Jon Carl Rauch è la motivaziun dad ella dentant betg in pensar fitg ferm per l'ambient ed il clima, mabain plitost in pensar economic.

Partida verd-liberala grischuna po sperar

Ils verd-liberals pon guardar optimistic sin la dumengia d'elecziuns mussan las pli novas cifras. Da l’unda verda che procura per schlantsch tar ils verd-liberals pudess profitar oravant tut il candidat grischun per il Cussegl naziunal Josias Gasser. Numnadamain dal schlantsch da la Verda, il partenari da la colliaziun da glista.

Dentant naginas schanzas haja la candidata per il Cussegl dals chantuns Geraldine Danuser. Dentant saja sia candidatura ina schanza per ils verd-liberals da far vegnir enconuschent in nov chau da la partida.

Quels che fissan pli prominents n’han betg mess a disposiziun.
Autur: Jon Carl Rauch

RTR Elecziuns 2019