La preschientscha en las medias vala sco pli impurtanta valur en il cumbat per l'attenziun dals electurs. Quai tenor in'analisa da l'universitad da Berna che Année Politique Suisse ha preschentà mesemna. Ed er sche las partidas recloman savens ch'i na vegnia betg rapportà equilibrà, mussia l'analisa che quai na saja betg il cas.
Placat cun mail e verms sco tirasguard
Ella mussa tranter auter er che las partidas san er sez crear attenziun en las medias. E quai en cas da basegn era cun provocar. Sco per exempel la PPS cun il placat dal mail ed ils verms. Cura che la PPS ha mez avust publitgà lur placat haja quel chaschunà in grond eco. Rinforzà la preschientscha mediala haja era la critica interna dal placat. A las autras partidas na saja quai betg gartegià.
Verds n'han betg nizzegià il clima
Oravant tut ils verds ed ils verd-liberals n'hajan betg pudì procurar per dapli artitgels en gasetta, malgrà che la politica dal clima è «il tema» da las elecziuns da quest onn. Sulet l'elecziun da Ronja Jansen sco presidenta da la Giuventetgna socialista svizra haja chaschunà intginas discussiuns e preschientscha mediala.
RR novitads 12:00