Siglir tar il cuntegn

Header

cuntegn

Elecziuns a Turitg Duas Rumantschas ed in Rumantsch vulan in sez en il parlament

Tina e Luis Deplazes e Maria Rosa Joller candideschan a Turitg – betg mo per in sez ma era per rimnar vuschs.

180 sezs ha il parlament dal chantun da Turitg, l’uschenumnà Cussegl dal chantun. 1'687 persunas candideschan per in da quests sezs. Tranter els era ils fragliuns Deplazes e Maria Rosa Joller. Il suveran Turitgais decida ils 12 da favrer.

Ils fragliuns Deplazes

Tina e Luis Deplazes, oriunds da Hinwil, vegnan d’ina famiglia politica. Gia il tat da Surrein ha politisà per la Partida cristiandemocratica (PCD), ed era il bab ha savens tematisà la politica a la maisa.

Il tat era pli conservativ, dentant n’essan nus politicamain betg uschè lunsch davent.
Autur: Tina Deplazes candidata Allianza dal Center per il Cussegl dal chantun ZH

Per ils fragliuns n’èsi betg l’emprima candidatura per in uffizi politic. Gia il 2019 han ils Deplazes candidà, quella giada sco rimnavuschs, per il Cussegl naziunal, bainchapì per duas differentas partidas. Tina Deplazes sin la lingia dal tat, pia per l’Allianza dal Center e Luis Deplazes per la Partida liberaldemocratica (PLD). Malgrà ch’ils Deplazes han ramassà en il fratemp experientscha politica – Luis è president dals giuvens liberals dal chantun Turitg, Tina è  vicepresidenta da la giuvna Allianza dal Center svizra e commembra dal parlament da Wetzikon – vesan els era questa giada be ina pitschna schanza sin in sez en il Cussegl dal chantun da Turitg.

Da vegnir elegì uss n’è betg realistic, jau hai la quarta plazza da tschintg, sin la glista da la PLD. La deputada enfin uss, Sonja Rueff-Frenkel, fa ina buna lavur.
Autur: Luis Deplazes candidat PLD per il Cussegl dal chantun ZH

Las premissas èn meglras tar la sora Tina Deplazes, ch’è sin il segund plaz da la glista da l’Allianza dal Center. Da vegnir elegida sin l’emprim plaz, nua che la deputada enfin uss, Yvonne Bürgin, è plazzada na saja dentant betg realistic. Ed era da survegnir in segund sez en il circul electoral saja grev per la partida. L’unica schanza da survegnir in sez en il Cussegl dal chantun vesa Tina Deplazes sche Yvonne Bürgin survegniss in sez en il Cussegl naziunal. Lura pudess Tina Deplazes suandar sin il sez da la deputada actuala. Quai dentant be sche Tina Deplazes tegna il segund sez tar las elecziuns.

audio
Ils fragliuns Deplazes candideschan
ord Actualitad dals 04.02.2023. Maletg: RTR
laschar ir. Durada: 4 minutas.

La noviza Maria Rosa Joller

Insumma nagin’experientscha ed era nagins conturns politics ha Maria Rosa Joller, ch'è oriunda da Scuol. L’economa da sanadad è vegnida politisada tar sia lavur sco tgirunza diplomada. Il squitsch sin la professiun saja gia daditg e constant aut, pervia da quai ha Maria Rosa Joller gidà il 2017 a ramassar suttascripziuns per l’iniziativa da la tgira, ch'è vegnida acceptada ils 28 da november 2021.

Tras las mancanzas da persunal hai jau durant dis libers adina gì il sentiment, u che jau stoss surpigliar in servetsch supplementar u che jau hai ina collega damain en il servetsch.
Autur: Maria Rosa Joller candidata PS per il Cussegl dal chantun ZH

Dapi in onn e mez fa Maria Rosa Joller lavur da lobby tar l’associaziun svizra da tgirunzas e tgirunz. Tras questa posiziun enconuschan ins la candidata da la Partida socialdemocratica (PS) en ils ospitals gronds. Dentant è er ella conscienta da sias pitschnas schanzas sin in sez en il Cussegl dal chantun da Turitg. Sia finamira principala haja ella gia cuntanschì cun plazzar la tgira sco in dals tschintg temas principals en la campagna dals socialdemocrats dal chantun da Turitg.

audio
La noviza Maria Rosa Joller
ord Actualitad dals 04.02.2023. Maletg: RTR
laschar ir. Durada: 3 minutas 55 Secundas.

In futur politic gea, dentant en tge furma?

Tar ils fargliuns Deplazes èsi cler, els vulan era en futur politisar e candidar per uffizis politics – e quai betg mo per rimnar vuschs. Quai fetscha dentant part dal process al cumenzament. Tuts dus pon s'imaginar da seser en il futur en il parlament naziunal. Tar Maria Rosa Joller n’esi anc betg cler sch’ella vuless anc ina giada candidar per in uffizi. Ad ella saja il tema impurtant. Per quel veglia ella s’engaschar era en il futur, però adina laà nua ch'ella stat. Quai saja per il mument amez la citad da Turitg, possia en il futur però era esser en ina regiun periferica en il Grischun.

RTR actualitad 08:00

Artitgels legids il pli savens