Noss tscharvè, quest’accumulaziun da cellas da la gnerva, saja in organ tut spezial, di Jean-Marie Annoni. Dapi 4 onns è el professur da neurologia a l’universitad da Friburg e perscrutescha là, co il tscharvè emprenda linguatgs. Per ordinari sa chattia il center linguistic en la part sanestra dal tscharvè. Lez possia dentant era s’organisar da nov sch’igl saja necessari. Lura per exempel, sch’il tscharvè è blessà tras in accident ubain donnegià tras in tumor.
Tras il vi e nà tranter plirs linguatgs vegn il tscharvè trenà e mantegna uschia sia plasticitad. Quai vegn dabun a la memoria.
Tenor Annoni datti ina differenza tranter il tscharvè da persunas che pledan mo 1 linguatg ed il tscharvè da persunas che pledan plirs linguatgs. Però damain quai che pertutgia la posiziun dal center linguistic, che plitost quai che pertutga las capacitads e funcziuns dal tscharvè.
