In dals fundaturs era numnadamain il politicher ed activist rumantsch Casper Decurtins da Trun. Ina persunalitad impurtanta per la cultura rumantscha sco editur da la Crestomazia e sco exponent da la renaschientscha rumantscha. Decurtins haja era tschertgà professurs novs per l’universitad ed è era sez stà professur per istorgia natirala.
Pertge gida in Sursilvan a fundar l'universitad a Friburg?
Mo pertge gida in Sursilvan a fundar in'universitad lunsch davent da las valladas rumantschas? Quai haja da far cun la confessiun, di Matthias Grünert. «L’universitad da Friburg è vegnida fundada sco universitad catolica per students dals chantuns catolics. E da l’entschatta hai era dà ina preschientscha da students e professurs rumantschs.» Dentant anc nagina purschida dal rom rumantsch. Quella datti pir dapi 1956, cura che Alexi Decurtins, l’anteriur schefredactur dal Dicziunari Rumantsch Grischun, ha cumenzà cun l'instrucziun da linguistica rumantscha.
Bandiera rumantscha sgulatscha anc adina
Oz, quasi 60 onns pli tard, èsi Matthias Grünert e ses collavuraturs che tegnan ad aut la bandiera rumantscha a l’universitad. Actualmain visitan da quai da 18 studentas e students sias prelecziuns. Rumantsch saja in rom plitost pitschen, mo quai possia era esser attractiv, di Matthias Grünert. Las gruppas sajan survesaivlas ed il contact tranter ils students ed ils docents pli direct e persunal.
Interessant saja il studi da rumantsch per exempel per quels che veglian ir a lavurar tar ils meds da massa rumantschs ni a las scolas secundaras ed als gimnasis.
