Elecziuns federalas 2015 - Ils recepts da las partidas

Avant las elecziuns fan las partidas magari grondas empermischuns. Ma sin tge temas mettan las partidas grischunas propi paisa? E co vulan ellas schliar las sfidas da noss chantun?

Durant in’emna ha in strateg da mintga partida respundì talas dumondas, quai mintgamai la bun’ura tranter las 08:00 e las 08:30 al Radio Rumantsch.

Partida burgais-democratica PBD (21-09-2015)

La Partida burgais-democratica è sut squitsch. E quai abstrahà da la decisiun che la cussegliera federala Eveline Widmer-Schlumpf fa, sch’ella resta ni chala. A la PBD vegn prognostitgà ina digren da vuschs tar las elecziuns naziunalas. Quai en il Grischun ed era sin palancà naziunal.

In dals temas centrals dals burgais-democratics grischuns en il cumbat electoral è l’energia.

Partida verd-liberala PVL (22-09-2015)

Avant 4 onns han ils Verd-liberals profità dal «bonus dal noviz». Che la Partida verd-liberala na va en nagin schema dretg-sanester para d’avair ses regl tar ils electurs. Uss hai però num per la PVL da sa cumprovar. Las prognosas per ils 18 d’october mussan ina digren da vuschs. En il Grischun ballucca il séz da Josias Gasser en il Cussegl naziunal.

In’economia liberala ed in ambient intact; Quai vul la Partida verd-liberala. In «orcan en in magiel d'aua» hai gì num davart dals Verd-liberals en il parlament en connex cun la fermezza dal franc. Propi mo in «problemet» era per il Grischun cun tut ses turissem?

Partida populara svizra PPS (23-09-2015)

Entant che las autras partidas sa distanzieschan, è la partida populara svizra gia pli dalung sin ina veritabla «unda da success». Tenor las retschertgas vegn la PPS anc pli ferm tar las elecziuns da l’october. En il Grischun è la partida sa declerada sco la partida d’economia. Perquai ch’ins ha gudagnà Magdalena Martullo-Blocher sco candidata?

Partida socialdemocratica PS (24-09-2015)

Per giustia sociala e per l’ambient. La partida socialdemocratica dat cunterpais als populists da la dretga. En il cumbat per pajas gistas han dentant gist duas iniziativas fatg naufragi quest onn. Tar las elecziuns da l’october vul la PS evitar che la dretga vegn anc pli ferma. Sin palancà naziunal vul la partida cuntanscher la marca da 20% da las vuschs. Ambiziuns ha è la PS grischuna.

Partida liberaldemocratica PLD (25-09-2015)

30 onns ha la partida liberaldemocratica pers cuntinuadamain vuschs tar las elecziuns naziunalas. La PLD grischuna n’è ils ultims 4 onns betg stada represchentada en il Cussegl naziunal. Ella ha pers ses mandat als Verdliberals. Gudagnar enavos il mandat è la gronda finamira. Che quai pudess grategiar crain ils experts. Ils electurs sajan puspè pli bainvulents vers la PLD.

Partida cristiandemocratica PCD (26-09-2015)

Per la Partida cristiandemocratica vai engiu. La partida ch’è sa declerada en il servetsch da las famiglias perda vuschs tar las elecziuns naziunalas. Il «C» cristian, quella ierta da pli da baud, lascha prender distanza bain insaquants. Era sch’ella vul esser ina partida surconfessiunala, en las testas è anc adina cementà che la PCD è la partida dals catolics.