Lura suondan la Partida liberaldemocratica (PLD) cun 15,8%, la Partida cristiandemocratica (PCD) cun 11,2%. La Partida ecologica svizra (PES) e la Partida verd-liberala (PVL) han il sustegn da mintgamai 7,3%. La Partida burgais-democratica (PBD) vegn anc sin 4,8%. Qua han valì las respostas dad 862 persunas ch'han sincerà da vulair ir garantidamain ad eleger (46%).
Ils pli gronds svilups tar la PVL e PPS – ina giada ensi, ina giada engiu
Il pli grond svilup ensi ha la PVL fatg cun gudagnar +1,9% dapli vuschs che tar las elecziuns dal 2011. Era in svilup positiv registreschan la PS (+1,4%) e la PLD (+0,7%). Las autras partidas perdan levet: PBD (-0,6%), lura era PCD (-1,1%). Il pli bler perda la PPS (-2%).
Las allianzas e la cumposiziun dal Cussegl federal
Uschia n'avess questa giada betg gidà ina colliaziun da PCD e PBD, perquai che questa avessan bain surpassà la PLD cun colliar – mabain betg la PS. Ina eventuala allianza ecologica (PVL/PES) avess bain avunda vuschs per ina eventuala participaziun en il Cussegl federal, fiss però tuttina restada davos PCD/PBD e PLD.
Tenor la retschertga cuntinuescha il trend dad electuras ed electurs en il center. Auter che la PS n'avess nagina partida dals pols gudagnà. Tranter auter era, perquai che la PS è tenor la retschertga la suletta partida che vegn da mobilisar l'agen electorat, surtut en las citads.