En stanza da scola han Vera Stiffler (PLD) e Heinz Brand (PPS) discutà ensemen cun quatter scolaras da la scola media spezialisada (FMS). Per tut ils involvids èsi stà ina situaziun nova. Suenter la discussiun èn tuts dentant da la medema opiniun: «Igl è stà ina bella experientscha.»
Discutar cun politichers n'è betg simpel
Al cumenzament èn las scolaras stadas in zic gnervusas da discutar cun ils politichers. Igl ha duvrà intginas minutas per vegnir a chaud.
Els tschantschan pulit bler e lura èsi magari grev d'interrumper els.
I saja dentant stà «cool» ch'ellas hajan pudì far dumondas a Vera Stiffler e Heinz Brand. Uschia sajan ils politichers vegnids in zic pli datiers ad ellas.
Ina bella experientscha – er per ils politichers
Vera Stiffler sco er Heinz Brand han giudì da discutar cun persunas giuvnas. I saja stà interessant d'udir, tge giavischs e propostas che las scolaras hajan, di Heinz Brand.
Oravant tut il traffic public è stà in tema central. Il traffic public che duess vegnir pli favuraivel. Vera Stiffler ha chapientscha per quests giavischs. Quai mussia ch'els stoppian sviluppar vinavant il traffic public, malgrà ch'el saja gia oz fitg bun.
A Heinz Brand ha fatg impressiun tge gronda paisa che las quatter giuvnas mettan sin cumprar en ecologic. El haja bler contact cun ils responsablels dals grossists. Tar ils proxims discurs veglia el metter sin l'agenda da discurrer sur da la purschida e dar là pli pauc paisa a la modernitad e dapli a l'ecologia.
RR actualitad 11:00