Pliras surpraisas per l'elecziun en il Grischun:
- Heinz Brand n'è betg vegnì reelegì, quai malgrà ch'el ha fatg avant quatter onns las pli bleras vuschs per il Cussegl naziunal e malgrà ch'el fiss daventà il 2021 il president dal Cussegl naziunal e cunquai il pli aut Svizzer.
- La PS ha da nov dus sezs en il Cussegl naziunal. La deputada da Cuira Sandra Locher Benguerel conquista in sez sper Jon Pult che defenda il sez da Silva Semadeni.
- Per la PLD dastga Anna Giacometti ir a Berna. Uschia returnan ils liberals en il Cussegl naziunal – sin donn e cust da la PBD. Sco favurits da la PLD valevan dentant plitost Michael Pfäffli e Vera Stiffler. Cun Anna Giacometti han paucs quintà. Ella è la presidenta da Bregaglia ed ha fatg in num sur ils cunfins grischuns tar la catastrofa da Bondo.
- Duri Campell (PBD) n'ha betg pudì defender ses sez. Suenter quatter onns è la carriera en il Cussegl naziunal a fin.
Defendì lur sezs
- Magdalena-Martullo Blocher (PPS) ha defendì ses sez recaltgà avant quatter onns e quai gist cun il meglier resultat da tut las candidatas e candidats dal Grischun.
- Il sez da Martin Candinas (PCD) n'è mai stà en privel ed el è vegnì reelegì per in'ulteriura perioda d'uffizi.
L'elecziun grischuna en cifras:
RR elecziuns 2019