Siglir tar il cuntegn

Header

cuntegn

Nova repartiziun dals sezs Pli verd, pli feminin, pli giuven

Igl ha dà divers segunds scrutinis. Suenter che tut ils sezs dal Cussegl dals chantuns èn repartids, pon ins dir che quel è pli verd, pli feminin e pli giuven. La ballantscha da las duas chombras resta però: La chombra pitschna è vinavant ina bastiun da las partidas dal center e da la dretga.

Il resultat final da la repartiziun dals sezs sumeglia il svilup en il Cussegl naziunal, sche er en ina maniera pli moderada. Ils Verds han multiplitgà lur preschientscha ed han da nov tschintg sezs. Da nov sesan 12 dunnas en il Cussegl dals chantuns, quai èn dubel uschè bleras sco enfin uss. Grazia a 22 novs chaus en il Cussegl dals chantuns è la vegliadetgna media da quel sa sbassada.

Nov sang

Tut en tut pon ins dir ch'i dat in vent frestg en il Cussegl dals chantuns. A partir dal december sesan 22 cussegliers e cusseglieras novas en la Chombra pitschna, quai è bunamain la mesadad. 19 cussegliers e cusseglieras ch'èn stads enfin uss en uffizi, n'han betg pli candidà. Plinavant n'èn Werner Hösli (PPS/GL), Beat Vonlanthen (PCD/FR) e Filippo Lombardi (PCD/TI) betg vegnids reelegids.

PS perda – ala sanestra gudogna tuttina

La pli gronda perdenta è la Partida socialdemocratica che perda trais da ses 12 sezs. Quai ha er da far cun quai che la PS ha stuì remplazzar ils pli blers sezs: set cusseglieras e cussegliers d'enfin uss n'han betg pli candidà. Dentant han ils Verds pudì cumpensar quella perdita per l'ala sanestra. Els han gudagnà quatter sezs e tegnan uschia da nov tschintg sezs. Uschia è l'entira ala sanestra vegnida pli ferma ed ha da nov 14 sezs (enfin uss 13 sezs).

Cussegl dals chantuns anc adina bastiun burgaisa

Tuttina, la maioritad en il Cussegl dals chantuns han anc adina las partidas burgaisas. La pli ferma partida resta la PCD (13 sezs), malgrà che quella perda in sez. La PLD ch'ha pudì mantegnair ses 12 sezs resta er la segund ferma partida.

Auter ch'en Cussegl naziunal – PPS gudogna 1 sez

Suenter che la Partida populara svizra ha stuì laschar plimas en il Cussegl naziunal po ella crescher per in sez en il Cussegl dals chantuns. Da nov ha la PPS sis sezs, cun Thomas Minder (senza partida) èn quai set. En il chantun Berna ha la PPS pudì reconquistar il sez da la PBD che n'è betg pli represchentada en la Chombra pitschna. En il Tessin ha Marco Chiesa conquistà in sez a cust da la PLD, en l'Argovia ha la PPS reconquistà il sez che la PS aveva tegnì ils ultims otg onns. Persuenter ha la PPS pers en il chantun Sviz, nua che Pirmin Schwander n'ha betg dumagnà l'elecziun.

Gia suenter l'emprim scrutini, la dumengia d'elecziuns ils 20 d'october 2019, èsi stà cler che dapli dunnas èn represchentadas en il Cussegl dals chantuns.

video
«Nus dunnas aviain tegnì ensemen»
Or da SRF News dals 20.10.2019.
laschar ir. Durada: 1 minuta 50 Secundas.

RTR elecziuns 2019

Artitgels legids il pli savens