La participaziun a las elecziuns en Svizra è relativamain bassa. En media importa ella tranter 40 e 60%. Quai n'è però betg mo d'attribuir a la mancanza da motivaziun. Bleras persunas han difficultads da chattar e da chapir las infurmaziuns necessarias.
Ultra da quai na dastgan persunas estras, persunas minorennas ed persunas sut curatella professiunala cumplessiva betg eleger.
Marcus Petendi, che na dastga er betg eleger, è s'inscuntrà cun diversas gruppas d'umans per discurrer da lur difficultads.
Episoda 1
Pertge na dastga Marcus Petendi betg eleger e tge pudess el far encunter? E pertge èsi insumma uschè impurtant da sa participar ad elecziuns?
Episoda 2
Per persunas cun impediments cognitivs èsi difficil d'eleger. Quai n'è però savens betg la mancanza d'interess. Persunas sut curatella professiunala cumplessiva n'han ultra da quai insumma nagins dretgs politics. En il discurs raquintan ina persuna pertutgada sco er il responsabel politic dad «Insieme» davart ils fatgs e las difficultads.
Episoda 3
Las Svizras ed ils Svizzers survegnan da princip il dretg d'eleger pir cun 18 onns. Quant raschunaivel fiss ina reducziun da questa vegliadetgna? E s'interesseschan minorens insumma per la politica? Ina scolara e dus scolars da la scola chantunala da Cuira raquintan lur opiniun.
Episoda 4
Las dunnas svizras dastgan eleger e votar pir dapi l'onn 1972. Co han las dunnas ed ils umens en memoria questa midada? En ina chasa d'attempads quintan abitantas ed abitants da lur cumportament d'eleger da lura e dad oz.
Episoda 5
La participaziun da las persunas cun dretg d'eleger è realmain pitschna. Pertge n'è l'interess tar tschertas persunas simplamain betg qua? En il discurs declera in nunelectur ses motivs.
