Che placats da campagnas electoralas vegnan tschufragnads è nagut nov. Ch'i dat in'istorgia enturn ils placats è in zic spezial. Uschia è quai schabegià a Castrisch nua che Carmelia Maissen, la presidenta da la vischnanca da Glion e candidata per il cussegl naziunal, è vegnida transfurmada sin in tal placat da nunenconuschents en in tgiet. Ernst Hänny sa distanziescha da quest act da vandalissem. Carmelia Maissen reagescha suveran:
Quai prend jau per enconuschientscha, quai è stà in'attatga anonima.
Questa istorgia ha cumenzà la primavaira cura che Ernst Hänny ha cumprà in tgiet per sias giaglinas. Il tgiet ha fatg sia lavur sco i descha, cun chantar la damaun baud avant las tschintg. La vischina Carmelia Maissen e ses partenari han sinaquai reclamà tar il pur e supplitgà quel dad isolar il giagliner.
Emprova da sa cunvegnir
La isolaziun ha gidà – dentant para betg avunda. Ulteriuras propostas èn vegnidas fatgas, ma la finala haja ina brev recumandada cun smanatschas tementà il pur, uschia ch’el ha dà davent il tgiet.
Dapi quest di na vul Ernst Hänny avair da far nagut pli cun sia vischina Carmelia Maissen. Lezza da sia vart ha empruvà da contactar il pur, ma senza success.
Jau n'hai nagin interess da seser ensemen cun els e discurrer. Els mo pretendan da nus e din a nus tge che nus duain far, per ch'i saja la finala meglier per els.
Il tgiet ch'ha chattà ina nova dimora tar in pur a Duin, n'ha dentant gì nagin cletg. Ina vulp ha stgarpà el, uschia ch'el chanta definitiv betg pli.
RR actualitad 17:00