Avant 26 onns han Cilgia e Ruodi Duschletta cumprà l’hotel Val d’Uina a Sur En, ina fracziun da Scuol. Sco giuvens hoteliers han els retratg la cassa da pensiun ed investì tut per realisar lur siemi. Ussa – cura ch'els fissan atgnamain pensiunads – daventa gist quai in'ipoteca: Per survegnir ils daners investids stuessan els pudair vender l'hotel. Quai che n'è betg uschè simpel – malgrà ch'il manaschi gira bain.
Tge fa la politica?
Per discutar ses dilemma envida l'ustier Ruodi Duschletta dus politichers enturn maisa radunda: Ils dus candidats per il Cussegl naziunal Martin Candinas (PCD) e Jon Pult (PS).
Persunas sco ti ed jau envidan candidatas e candidats per il Cussegl naziunal ad ina baterlada. Enturn maisa raquintan els dad ina sfida che fatschenta els en lur mintgadi. Quels 5 inscunters emetta RTR durant 5 mesemnas:
- 04-09 Ovras socialas tar Ruodi Duschletta, Sent
- 11-09 Sanadad tar Sandra ed Andri Baltermia, Salouf
- 18-09 Economia tar Flurina e Simon Kaufmann-Henkel, Cuira
- 25-09 Clima tar ina classa da la scola media, Glion
- 02-10 Diaspora tar Peter Vesti e Petra Camathias, Turitg
Tar mintga tema dain era in sguard en l'istorgia, preschentain cifras e fatgs e numnain las sfidas actualas.
Las elecziuns naziunalas èn ils 20 d'october 2019.
RR actualitad 11:00