Sco famiglia cun trais uffants saja lur quint per las premias da cassas da malsauns pulit grond – e quai malgrà ch'els fetschian tut il pussaivel per tegnair bass quel. Uschia descriva Sandra Baltermia la situaziun. Ella fa la contabilitad per la famiglia e sa perquai che las premias muntan a passa 10% da las entradas. Ed il problem: Las premias creschan probabel vinavant.
Tge fa la politica?
Per discutar quai han Sandra ed Andri Baltermia envidà duas politicras tar els a chasa a Salouf: Las duas candidatas per il Cussegl naziunal Anita Mazzetta (La Verda) e Martha Widmer-Spreiter (PBD).
Persunas sco ti ed jau envidan candidatas e candidats per il Cussegl naziunal ad ina baterlada. Enturn maisa raquintan els dad ina sfida che fatschenta els en lur mintgadi. Quels 5 inscunters emetta RTR durant 5 mesemnas:
- 04-09 Ovras socialas tar Ruodi Duschletta, Sent
- 11-09 Sanadad tar Sandra ed Andri Baltermia, Salouf
- 18-09 Economia tar Flurina e Simon Kaufmann-Henkel, Cuira
- 25-09 Clima tar ina classa da la scola media, Glion
- 02-10 Diaspora tar Peter Vesti e Petra Camathias, Turitg
Tar mintga tema dain era in sguard en l'istorgia, preschentain cifras e fatgs e numnain las sfidas actualas.
Las elecziuns naziunalas èn ils 20 d'october 2019.
RR actualitad 11.00