Siglir tar il cuntegn

Header

Video
Purtret da la classa FHMS 3 Glion
Or da RTR Social dals 24.09.2019.
abspielen
cuntegn

Purtret 4: Scola media Glion Er ils giuvens n'èn betg adina pronts da desister

Ils effects da la midada dal clima vegnan adina pli preschents. Er la giuventetgna fa adina dapli patratgs. Blers giuvens èn ids a demonstrar ils ultims mais. Patratgs han era fatg scolarAs da l'ultim onn da la scola mercantila (HMS) e scola spezialisada (FMS) a Glion. Però senza demostrar.

17 scolaras e scolars dumbra la davosa classa da la HMS e FMS en il Center da furmaziun Surselva a Glion. Nagin dad els è stà a demonstrar ils ultims onns per il clima, dentant èsi tuttina in tema che muventa las giuvnas ed ils giuvens ch'èn tuts enturn 18 onns.

La classa FHMS 3 dal center da furmaziun Surselva

Personen-Box aufklappenPersonen-Box zuklappen

Ils 17 scolars e scolaras da la FHMS3 èn partids en duas classas. Quatter scolars visitan la scola mercantila (HMS). 13 scolaras visitan la scola media spezialisada (FMS). Tar ils scolasts Claudio Bundi ed Aluis Tambornino èn els sa preparads sin l'inscunter cun ils dus politichers Heinz Brand (PPS) e Vera Stiffler (PLD).

È la giuventetgna pronta da desister?

La stad han la scolaras e scolars dastgà ir en l'exteriur per meglierar l'englais. Insatge che tutga tar la scolaziun da trais onns. Pliras scolaras e scolars èn er stàds en ils Stadis Unids per emprender englais

Cler, ins fa patratgs davart l'ambient. Ma la motivaziun da vesair insatge dal mund è magari pli gronda.
Autur: Sarina Tonoliscolara

Ma, la classa F/H 3 è er claramain da l'avis che sgular saja memia favuraivel. Quai fiss tenor els dentant la lavur da la politica d'introducir taxas sin cherosin. Ozendi èsi numnadamein pli favuraivel da sgular a Londra u a Paris che dad ir cun tren.

Jau sun da l'opiniun ch'ins duess ir cun tren dapertut nua ch'igl è pussaivel dad ir cun tren.
Autur: Muriel Seeliscolara

La finala saja dentant er mintga solia persuna sezza responsabla, sch'ella vul far insatge en favur dal clima u betg.

Il project da RTR «Ti ed jau faschain politica»

Il project da RTR «Ti ed jau faschain politica»

Persunas sco ti ed jau envidan candidatas e candidats per il Cussegl naziunal ad ina baterlada. Enturn maisa raquintan els dad ina sfida che fatschenta els en lur mintgadi. Quels 5 inscunters emetta RTR durant 5 mesemnas:

  • 04-09 Ovras socialas tar Ruodi Duschletta, Sent
  • 11-09 Sanadad tar Sandra ed Andri Baltermia, Salouf
  • 18-09 Economia tar Flurina e Simon Kaufmann-Henkel, Cuira
  • 25-09 Clima tar ina classa da la scola media, Glion
  • 02-10 Diaspora tar Peter Vesti e Petra Camathias, Turitg

Tar mintga tema dain era in sguard en l'istorgia, preschentain cifras e fatgs e numnain las sfidas actualas.

Las elecziuns naziunalas èn ils 20 d'october 2019.

RR actulalitad 12:00