Siglir tar il cuntegn

Header

cuntegn

Quai scrivan las medias L'unda verda pli ferma che quintada

La colur verda ha conjunctura auta – ch'ils verds ed ils verdliberals vegnian gist da recaltgar tants nova mandats, è er ina surpraisa per bleras medias.

Las gasettas grischunas celebreschan cunzunt maioritad da las dunnas en il Cussegl naziunal grischun. Pussaivel fiss stà ch'il Grischun avess tarmess nagina dunna a Berna, uss èn ellas schizunt en trais, quai cun la reelecziun da Magdalena Martullo-Blocher (PPS) e l'elecziun da Sandra Locher Benguerel (PS) ed Anna Giacometti (PLD). Il «Bündner Tagblatt» scriva ch'il proporz haja qua giugà ina gronda rolla e chaschuna ina vaira surpraisa cun trais dunnas fermnas en il Cussegl naziunal.

Betg mo in'unda mabain in diluvi verd

Il tema dal clima, saja definitivamain er arrivà en il Grischun, quai scriva la «Südostschweiz». Quel vegnia ad ecologisar la politica svizra ils proxims onns. E La Quotidiana scriva ch'il sistem politic svizzer che sa basia sin stabilitad e concordanza saja tuttina anc bun per surpraisas, per ils Verds schizunt cun ina victoria istorica.

Er las gasettas da la Bassa èn surstadas da la vehemenza da l'unda verda. Il «Blick» resumescha sin ses frontispezi suandontamain: «Erwartet wurde eine grüne Welle, es kam die grüne Flut» e scriva d'in'elecziun da clima che haja purtà ina victoria istorica. Il «Tagesanzeiger» è da l'avis ch'ils verds sajan madirs per il Cussegl federal. Da fertant commentescha la «NZZ» che verd haja conjunctura auta en tuttas tendenzas politicas. La dumonda decisiva saja quant fitg che la Svizra restia in lieu da pragmatissem e prontadad da cumpromiss.

RR novitads 06:00