Per il cusseglier naziunal Duri Campell na vegni strusch a dar ina proxima legislatura. La PBD perda numnadamain 5,2% da las vuschs tenor la retschertga da Sotomo e vegn anc sin 9,3%.
Jau sun surprais quant ferm che la PBD perda.
La Partida burgais-democratica haja sias ragischs en il Grischun e perquai fetschia surstar ch'ella perdia quasi in terz da votantas e votants. La PBD haja ina gronda concurrenza en il center politic entras cristiandemocrats e liberaldemocrats.
Dentant era sche la PBD pudess perder ses sez – restass quel probabel en il center burgais. Tenor Michael Hermann pudess la PLD profitar e recaltgar quest sez. Quai fiss in success, cunquai ch'ils liberals grischuns n'èn dapi las elecziuns 2011 betg pli represchentads en il Cussegl naziunal. Lura aveva Tarzisius Caviezel pers ses sez al verd-liberal Josias Gasser. Per las elecziuns dals 20 d'october van ils liberals cun Michael Pfäffli e Vera Stiffler a la testa en la cursa.
La retschertga mussa era che la PCD è en ina situaziun confortabla – cuntrari a la tendenza naziunala, nua che la partida perda. La Partida cristiandemocratica vegn sin 16,7% ed è la terz ferma partida dal Grischun. Cunquai èsi probabel che Martin Candinas po cuntinuar cun sia lavur en il Cussegl naziunal.
Resumaziun dals resultats
RTR actualitad 17:30