Siglir tar il cuntegn

Header

Purtret da trais pitgas da colliaziuns da glistas, quella dals verds e ps, quella dals burgais e la pcd e quella da la pps.
Legenda: Ils pols da sanester e dretg èn pli u mains tuttina ferms en Grischun. RTR Grafica
cuntegn

Retschertga grischuna PPS sto tremblar, PS e Gasser pon sperar

Ina cursa piz a cup tranter dretg e sanester in mais avant las elecziuns naziunalas. Quai è il resultat d'ina retschertga che RTR e Somedia han laschà far l'institut da perscrutaziun Sotomo en il Grischun.

La PPS dal Grischun survegn tenor la retschertga 29,1% da las vuschs. L'allianza sanestra cun PS, Verdliberals e Verds vegniss dentant sin 30,7%. Cunquai che la quota da sbagls da la retschertga è tar 2,4 puncts procentuals, è la cursa averta.

Ins na sa anc betg sin tge vart ch'i cupitga.
Autur: Michael HermannManader da l'institut Sotomo

La PPS ha dapi quatter onns dus represchentants en il Cussegl naziunal: Heinz Brand e Magdalena Martullo-Blocher. In dad els sto dentant tremblar da vegnir reelegì ils 20 d'october.

Unda verda – era en il Grischun

Ch'i dat insumma ina cursa piz a cup tranter dretg e sanester è surtut d'atribuir a l'unda verda: La Partida verda gudogna tenor la retschertga 4,8% e la Partida verd-liberala 1,2%. La Partida socialdemocratica vegn pli u main da tegnair ses electurs e resta cunquai segund ferma partida en il Grischun. Igl è pia probabel che Jon Pult vegn da defender il sez da Silva Semadeni - e forsa basta quai perfin per dapli.

Prendì il cas ch'i gartegia a l'allianza verd-cotschna da recaltgar in sez da la PPS, èsi avert a tgi che quel appartegness: I pudess esser che Josias Gasser reconquista il sez verd-liberal pers avant quatter onns – i pudess dentant er esser che la Partida socialdemocratica vegn puspè ad in segund sez en il Cussegl naziunal.

Purtret da la fermezza da las partidas avant quatter onns e suenter la retschertga da Sotomo.
Legenda: Las midadas ch'èn da spetgar - cumpareglià cun il 2015. RTR, Grafica

Resumaziun da tut ils resultats

Video
PBD sto tremblar per ses sez en il Cussegl naziunal
Or da Telesguard dals 19.09.2019.
abspielen

La retschertga da Sotomo

Personen-Box aufklappenPersonen-Box zuklappen

L’enquista online ha l’institut Sotomo fatg tranter ils 4 ed ils 16 da settember 2019 sin ils portals d’internet dad RTR e da la Somedia. Bun 1'000 persunas èn sa participadas. La quota da sbagl munta a 2,4 puncts procentuals.

RTR actualitad 17:30