Il chantun Friburg ha elegì l'emprima dunna en il cussegl dals chantuns. Johanna Gapany da la PLD ha fatg en il segund scrutini 31'122 vuschs ed uschia dapli ch'il cusseglier dals chantuns fin uss, Beat Vonlanthen da la PCD. Lez ha fatg 30'964 vuschs. Gapany ha 31 onns ed è er deputada dal Cussegl grond en il chantun Friburg.
Las pli bleras vuschs ed uschia reelegì è il president da la PS Svizra, Christian Levrat. Pervi d'ina panna hai dà in retard cun publicar ils resultats definitivs. I saja stà ina panna da communicaziun ha fatg a savair la chanzlia statala da Friburg.
En il Vad perda la PS ses mandat
En il chantun Vad ha il cusseglier dals chantuns d'enfin ussa Olivier Francais da la PLD dumagnà la reelecziun. Il segund sez va a la verda Adèle Thora. Ella ha fatg dapli vuschs che la socialdemocrata Ada Marra.
Represchentanza da Genevra resta verd-cotschna
A Genevra datti ina victoria per cotschen-verd. Lisa Mazzone dals verds e Carlo Sommaruga da la PS èn lunsch avant ils candidats burgais.
Record da dunnas en chombra pitschna egualisà
En l'avegnir vegnan las dunnas ad occupar almain 11 dals 46 sezs en il Cussegl dals chantuns. Quai correspund al record da l'onn 2003. Pussaivel è perfin in nov record en il Cusegl dals chantuns. Tar ils segunds scrutinis che han lieu las proximas dumengias en Svizra, hai anc pliras dunnas sco candidatas.
RR novitads 16:00+