Siglir tar il cuntegn
Inhalt

Svizra Elisabeth Schneider-Schneiter vul succeder a Leuthard

La cussegliera naziunala da la Partida cristiandemocratica, Elisabeth Schneider-Schneiter vul daventar cussegliera federala e successura da Doris Leuthard. La PCD da Basilea-Champagna ha nominà ella a la cumissiun per chattar in candidat u ina candidata.

Elisabeth Schneider-Schneiter durant ina intervista.
Legenda: La PCD da Basilea-Champagna ha nominà Elisabeth Schneider-Schneiter. Keystone

Basilea-Champagna saja in chantun progressiv ed haja il dretg sin in sez en il Cussegl federal, ha ditg Schneider-Schneiter. Sco cussegliera federala s'engaschass ella per las valurs da la Svizra e defendess ils interess da la Svizra a moda offensiva, ha ella ditg. Sias experientschas en la politica exteriura sajan impurtantas per tut ils departaments.

Schneider-Schneiter è dapi il 2010 en il Cussegl naziunal. Il 2015 è ella vegnida reelegida per pauc. Il mument è ella la presidenta da la cumissiun per affars da la politica exteriura en il Cussegl naziunal. Ella fa er part dal presidi da la PCD da la Svizra.

Las partidas chantunalas da la PCD pon anc inoltrar candidaturas fin ils 25 d'october. Fin uss vulan gia Heidi Z'graggen e Peter Hegglin entrar en il cumbat per il sez en il Cussegl federal.

RR novitads 20:00