Siglir tar il cuntegn

Header

Navigaziun

Il sbuf d'in auto.
Legenda: Las emissiuns da CO2 ed auters gas cun effect da serra èn tut en tut bain vegnidas reducidas il 2017, las finamiras na vegnan dentant betg cuntanschidas. Keystone
cuntegn

Svizra Emissiuns da CO2 èn levamain idas enavos

Las raschuns per la diminuziun da las emissiuns da CO2 ed auters gas cun effect da serra èn, tranter auter, ils edifizis – che sajan daventads pli effizients areguard l’energia e l’enviern che saja stà miaivel.

Il 2017 hai dà en Svizra damain emissiuns cun gas da serra. En tut sajan vegnids emess 47 milliuns tonnas CO2 ed auters gas cun effect da serra, ha communitgà l’Uffizi federal d’ambient, BAFU. Quai è 1 milliun damain che l’onn avant.

Emissiuns da bajetgs sbassadas, ma betg avunda

Las emissiuns da CO2 ed auters gas cun effect da serra da bajetgs han muntà il 2017 a 12,6 milliuns tonnas. Quai èn 0,6 tonnas damain ch'il 2016 e circa tuttina bler sco il 2015. Tut en tut èn las emissiuns da chasas stadas il 2017 per 26% pli bassas ch'il 1990. La finamira fiss dentant da sbassar quellas per 40% fin il 2020.

La raschun che las emissiuns da bajetgs han pudì vegnir sbassadas il 2017 èn, che l'enviern è stà miaivel e ch'ils bajetgs èn vegnids adattads uschia, ch'els èn pli effizients areguard l'energia. Che l'enviern ha però anc adina ina gronda influenza sin las emissiun, vul tenor BAFU dir, ch'anc adina blers bajetgs vegnan stgaudads cun energia fossila.

Dapli emissiuns dal traffic sin via

Las 15 milliuns tonnas CO2 ed auters gas cun effect da serra da traffic sin via dal 2017 èn 1% dapli che l'onn 1990. Il 2017 èn las emissiuns sa sbassadas per 2% en cumparaziun cun il 2016. Raschun per quella diminuziun è, ch'il turissem da tancar ord auters pajais en Svizra ha prendì giu e ch'il diever da carburants biologics è s'augmentà.

Per kilometer emettan ils autos bain damain CO2 che pli baud. Ils respargns da quai, vegnan dentant cumpensads cun il fatg, ch'i vegn charrà bler dapli. Fin il 2020 fiss la finamira da sbassar las emissiuns da CO2 dal traffic sin via en Svizra per 10% – cumpareglià cun il 1990. Quella finamira vegn dentant tenor il BAFU manchentada cleramain.

RR novitads 15:00