Siglir tar il cuntegn
Inhalt

Svizra Emmi venda sia cumpart da producent da mozzarella

L'elavuratur da products da latg svizzer Emmi, venda sia cumpart vi dal producent da chaschiel frestg e mozzarella talian «Venchiaredo».

Purtret dal logo dad Emmi.
Legenda: Emmi venda sia cumpart d'in elavuratur da latg talian. Keystone

Emmi aveva tegnì ina cumpart da 24% dal producent da chaschiel frestg e mozzarella talian «Venchiaredo». Questa cumpart ha el ussa vendì. La raschun saja ch’els veglian sa concentrar sin autras fatschentas en l’Italia, scriva Emmi. La vendita da la cumpart da «Venchiaredo» na vegnia betg ad influenzar il gudogn dad Emmi.

«Venchiaredo» producescha mozzarella, stracchino, mascarpone, ricotta e paintg. Radund dus terzs da sia svieuta da 20 milliuns euros fa la fatschenta en l'Italia.
Il 2010 è Emmi sa participà a «Venchiaredo». Sco emprim cun ina cumpart da 10%. Finamira saja stà da crescher en il martgà da chaschiel frestg en l'Italia e per pudair stgaffir sinergias cun products da «Trentinalatte».

Segunda vendita ils ultims onns

Suenter la vendita da «Trentinalatte» il 2014 è Emmi sa decidì dad er vender la cumpart da «Venchiaredo». Quella vegn surpigliada da «Granarolo» a Bologna. La strategia, da vulair investir en martgads e segments cun in grond potenzial da crescher, vegnia dentant mantegnida, uschia Emmi.

Emmi è l'elavuratur da products da latg dominant en Svizra. 2016 ha el cuntanschì ina svieuta da 3,3 milliardas francs ed in gudogn net da 140 milliuns francs. Dals en tut 5'800 collavuraturs lavuran 3'000 en Svizra.

RR novitads 11:00