Il Cussegl naziunal vul chastiar pli fitg la violenza envers policists, uffizials e persunal da tren. El ha approvà duas iniziativas parlamentaras en quest connex. Pervi da plirs cas da violenza cunter emploiads dal stadi, saja necessari da rinforzar las mesiras.
Las duas iniziativas pretendan d'adattar la lescha penala. Quels che sa participeschian a violenza encunter emploiads dal stadi stoppian quintar cun chastis da praschun u da daners.
Restricziuns pli severas necessarias
La maioritad da la cumissiun da dretg ha cusseglià d'approvar las propostas. Divers cas da violenza encunter emploiads dal stadi fetschian necessari da rinforzar las restricziuns a moda marcanta, scriva la cumissiun. La cumissiun dal Cussegl dals chantuns ha dentant refusà las propostas. Ella è da l'avis che quest problem duai vegnir tractà en il rom da l'armonisaziun da chastis.
Sco proxim va la fatschenta en il Cussegl dals chantuns. El sto approvar las propostas avant ch'i po vegnir elavurà ina proposta concreta.
RTR novitads 06:00