Quest’emna ha la SBB communitgà da serrar la fin da l’onn tut ils biros da viadis perquai ch'i na rendian betg pli. Tenor Barbara Rytz, la responsabla per la furmaziun da Login saja previs, ch’ils emprendists che fineschan lur emprendissadi il 2016, pon finir tenor plan l’emprendissadi. Davent dal schaner 2016, cura ch’ils biros da viadis sajan serrads, possian ils emprendists lavurar per exempel vi d’in spurtegl da bigliets da la viafier enfin la fin da l’emprendissadi.
Midar professiun u firma
Per quels che fan l’emprendissadi «Commerziant da biro da viadis» che finescha pir l’onn 2017 saja previs, che quels possian midar la professiun sin «Commerziant dal traffic public KV-ÖV». Tenor Barbara Rytz duess quai esser pussaivel cun visitar ulteriurs curs, senza ch’il temp d’emprendissadi sa prolungheschia.
Per quels che veglian finir l’emprendissadi sco commerziant da biro da viadis, gidia ins a tschertgar in post en in biro da viadis extern. Desditgas per emprendissadis che cumenzan quest onn na stoppian ins dar naginas, perquai che la Viafier federala haja gia avant plirs mais decidì da betg emploiar pli emprendists en ils biros da viadis, ha ditg Barbara Rytz da Login.