Strusch ina interpresa svizra è creschida uschè fitg durant la pandemia da corona sco il furnitur da farma Lonza. Quai cun producir la substanza per la vaccinaziun da Moderna. La svieuta repassada è creschida l'emprim mez onn sin passa 2,5 milliardas francs. Quai è in plus da 13,3% cumpareglià cun l'onn avant.
Sut il stritg ha il concern fatg durant l'emprim semester in gudogn net da 321 milliuns francs. Quai anc cun includì la sparta da chemia ch'è fin mez dal 2021 anc stà ina part da Lonza. Dapi la separaziun da quella sparta sa concentrescha Lonza entir ed entratg sin sia rolla sco partenari da producziun per l'industria da farmazia e biotecnologia. Il concern Lonza focusà vul uss crescher marcantamain pli svelt e generar dapli gudogn che la firma d'enfin qua. Fin il 2023 ha il concern en mira in augment da la svieuta en in'autezza procentuala da duas cifras.
Tranter auter producescha Lonza a Visp substanzas activas per medicaments, e quai sin incumbensa da concerns da farmazia – in exempel è la producziun da substanzas per il vaccin da la firma americana Moderna.