Igl è ina trista statistica. Bunamain mintga duas emnas mora ina dunna en Svizra pervia da violenza en chasa. E mintga di sto la polizia intervegnir en tschients da cas pervia da dispitas famigliaras u attatgas violentas da partenaris.
Per la cussegliera federala Elisabeth Baume-Schneider è quai ina situaziun nunpussaivla che procura per blera dolur e suffrienza, betg mo en las famiglias mabain per l'entira societad. Ensemen cun ils chantuns e diversas organisaziuns d'agid ha ella perquai lantschà oz l'emprima campagna da prevenziun naziunala cun il num «Egualitad impedescha violenza».
Nus vulain che persunas pertutgadas vesan che quai ch’ellas fan tras è violenza, ch’ellas san che agid exista.
Ina da las persunas responsablas tar la Confederaziun è Gian Beeli. El è co-directur da l'Uffizi federal per l'egualitad tranter dunna ed um (EBG). I giaja per situaziuns a chasa nua che savens dunnas fetschian l'experientscha da violenza. E là possian ins mussar che gist en las relaziuns nua ch'i na dettia betg ina egualitad, vul dir nua ch'i dettia ina dependenza, saja la probabilitad da violenza pli gronda.
Nus savain da studis che relaziuns nua che omadus contribueschan cun lur pajas a la finanziaziun dal da chasa communabel ed era nua che decisiuns vegnan prendidas ensemen, che quellas relaziuns han main violenza.
Che la campagna vegn tard considerond il grond dumber da cas na lascha Beeli betg valair. La campagna mettia in nov accent, numnadamain sin il mument nua che la violenza cumenzia. Quai sajan muments subtils nua che la dunna metta forsa en dubi sa sezza, na crai betg che quai è gia violenza, crai che quai saja normal.
Quai èn muments fitg essenzials sch’ins viva ina relaziun da violenza da realisar che quai n’è betg in urden, jau dastg ir per agid, jau stoss ir per agid per vegnir or da quella situaziun.
Indizis che mussan che insatge n’è betg bun dettia blers, di Gian Beeli. Sch’il partenari sappia adina nua ch’ins è, quella controlla permanenta possia gia esser ina sort da violenza. Impurtant saja da chapir che violenza na schabegia betg or dal nagut, i dettia savens ina lunga istorgia.
Per midar la societad na tanschian placats ed ina pagina internet (senza-violenza.ch/rm) betg, conceda Gian Beeli. I dependia era dals daners. Il Parlament federal haja decidì 1,5 milliuns francs per onn per quella campagna ed era ils chantuns hajan per part investì per multiplitgar la campagna. Els hajan era augmentà las resursas localas.
Metter a disposiziun letgs en chasas da dunnas è fitg impurtant, ma i dovra era in agid da 24/7 e perquai vegn lantschà il numer naziunal 142 l’autra primavaira.
Ils chantuns ed era il Grischun sajan engaschads en la campagna. I dettia era placats rumantschs, agiunta Gian Beeli.