- Elisabeth Kopp è morta en la vegliadetga da 86 onns.
- La politicra da Turitg è vegnida elegida sco emprima dunna 1984 en il Cussegl federal.
- Ella è morta venderdi sontg suenter lunga malsogna.
La Confederaziun scriva: «Cun gronda tristezza ha il Cussegl federal prendì enconuschientscha che l’anteriura cussegliera federala Elisabeth Kopp è morta en la vegliadetgna da 86 onns.» Il Cussegl federal e la Chanzlia federala expriman a la famiglia ed als confamigliars lur condolientscha.
Kopp era vegnida elegida ils 2 d’october 1984 en l’emprim scrutini en il Cussegl federal. L’elecziun saja stada in mument decisiv per l’egualitad da las dunnas en Svizra, scriva il Cussegl federal. Cun quai haja 13 onns suenter l’introducziun dal dretg da vuschar da las dunnas en Svizra per l’emprima giada ina dunna dumagnà l’elecziun en la regenza dal pajais. Elisabeth Kopp è s’engaschada spezialmain per l’egualitad tranter um e dunna.
Squitsch public chaschuna demissiun
Il 1989 è Kopp sa retratg dal Cussegl federal. Il 1988 era vegnì enconuschent ch’ella aveva en in telefonat supplitgà ses um da sa retrair d’ina interpresa pervi d’ina participaziun eventuala en cas da lavar daners. Il squitsch public ha la finala intimà ella da sa retrair dal Cussegl federal, malgrà ch’ella aveva adina renvià mintga culpa morala u giuridica.
In onn pli tard è ella vegnida deliberada dal Tribunal federal da la renfatscha d’avair violà il secret d’uffizi. Suenter sia demissiun è Elisabeth Kopp l’emprim sa retratga da la publicitad.
Or da l'archiv
