Tschessada è l'aspectativa da vita dapi decennis betg pli en Svizra, ha communitgà l'Uffizi federal da statistica. Tar ils umens hai dà quai l'ultima giada l'onn 1944, tar las dunnas l'onn 1962.
Tschessada fermamain è l'aspectativa da vita per persunas a partir da 65 onns. Tranter il 2019 ed il 2020 è lur aspectativa sa reducida pervi dals mortoris entras Covid-19 per 0,7 onns tar umens e per 0,5 onns tar dunnas. L'aspectativa da vita dals umens a partir da 65 è sa sbassada da 20,0 sin 19,3 onns, tar las dunnas da 22,7 sin 22,2 onns.
Tar ils umens n'hajan ins anc mai vis ina tala reducziun, scriva l'Uffizi federal da statistica. Tar las dunnas schon, numnadamain l'onn da guerra 1944, pervi d'in enviern spezialmain dir.