Siglir tar il cuntegn

Header

video
Berset: «La crisa ha mussà nua che la lescha sto vegnir adattada»
Or da News-Clip dals 29.11.2023.
laschar ir. Durada: 47 Secundas.
cuntegn

En cas d'epidemias Chantuns e parlament duain avair pled en chapitel

  • Il Cussegl federal ha avert la consultaziun tar la revisiun parziala da la lescha d'epidemias.
  • La Confederaziun ed ils chantuns duain uschia proteger anc meglier la sanadad da la populaziun cunter smanatschas futuras tras malsognas transmissiblas u tras resistenzas d'antibiotica.
  • La consultaziun dura fin ils 22 da mars 2024.

Per meglierar la coordinaziun tranter ils chantuns e Berna, en situaziuns sco la pandemia da corona vul il Cussegl federal adattar la lescha d'epidemias. Il minister da sanadad Alain Berset ha constatà che la lescha d’epidemias da l'onn 2016 saja stada in instrument cumprovà durant la pandemia da corona.

Blers elements en il provediment cun rauba medicinala impurtanta, en la surveglianza, en l’introducziun da mesiras adequatas sco era en la coordinaziun tranter la Confederaziun ed ils chantuns hajan funcziunà bain.

Auters elements pretendian dentant tschertas adattaziuns punctualas, ha ditg il president da la Confederaziun. Tenor il Cussegl federal fissi quai d'optimar il model d'escalaziun da trais stgalims che cuntegna la situaziun normala, speziala ed extraordinaria en la lescha.

Dapli cogestiun per chantuns e parlament

En cas d'ina periclitaziun da la sanadad tras ina malsogna transmissibla pussibilitescha questa regulaziun ina repartiziun da cumpetenzas clera tranter la Confederaziun ed ils chantuns.

Tar la giudicaziun d’ina situaziun da privel per la sanadad duain ussa dentant ils chantuns ed il parlament vegnir integrads meglier en l’avegnir. Uschia duai vegnir mitigià in pau il schoc ch’ins haja gì durant corona cun midar da la situaziun normala a la speziala tras ina «fasa da preparaziun sin la situaziun speziala». Quai cun ina cooperaziun pli stretga tranter la Confederaziun ed ils chantuns, ha declerà Berset.

Las limitas fixas per las trais graduaziuns na duain dentant betg vegnir previsas en il model d’escalaziun, perquai che quellas pon variar tut tenor la pandemia. 

Il sboz da revisiun regla a medem temp sut tge premissas ch’il Cussegl federal surpiglia incumbensas dals chantuns e tge ch’el po ordinar. Ultra da quai duain las mesiras vegnir rinforzadas e concepidas a moda pli lianta en vista a las pandemias futuras. Tschertas mesiras areguard il homeoffice, l’obligaziun da purtar mascras, ils certificats u ils concepts da protecziun vegnan medemamain precisadas.

Meglra surveglianza e colliaziun

La nova regulaziun cuntegna er il rinforzament, la digitalisaziun ed ina meglra colliaziun dals sistems e da las metodas per survegliar las malsognas transmissiblas. Latiers tutgan per exempel il sistem d’annunzia naziunal, il monitoring da las auas persas ed il sequenziament da gens.

La pandemia da Covid-19 haja mussà quant impurtant che quests sistems sajan per pudair tschiffar il svilup da la situaziun e per pudair instradar ad uras mesiras adequatas. Cun rinforzar ils sistems da surveglianza possian novas smanatschas en l’avegnir vegnir renconuschidas meglier.

RTR novitads 14:00

Artitgels legids il pli savens