La politica svizra e la legislaziun na sajan betg stadas preparadas bain avunda sin la situaziun precara che cuntinuescha, ha declerà Gastrosuisse. Bain dettia en la lescha d'epidemias ina basa, ch'obligheschia las autoritads da prender mesiras severas per proteger la populaziun. In dretg sin indemnisaziuns per ils manaschis pertutgads na dettia dentant betg.
Il president da Gastrosuisse resumescha la situaziun uschia:
Ils reglaments per cas da direzza na funcziuneschan betg.
Interpresas ch'èn fermamain pertutgadas e lur persunal vegnian indemnisads memia pauc bain e bler memia tard. Tschientmillis persunas sa sentian laschadas a mesa via.
Sclerir dumondas avertas avant proxima pandemia
Quai saja la raschun che Gastrosuisse lantschia l'iniziativa. Quella duaja en futur fixar las reglas, sche fatschentas e manaschis stoppian serrar pervi d'ina pandemia. I dettia bleras dumondas avertas e quellas stoppian exnum vegnir scleridas avant ina proxima pandemia.
L'iniziativa vegnia sustegnida da pliras gruppas d'interess, in text na saja però anc betg elavurà. Quai duaja capitar durant l'atun, ha declerà il cusseglier naziunal da la PCD da Sviz, Alois Gmür.
Sustegn er da l'associaziun grischuna
La situaziun actuala per la gastronomia en Grischun saja reglada bain, cunquai ch'il barat cun la regenza grischuna funcziunia. In sguard sur ils cunfins dal chantun mussia dentant, che quai na saja betg en mintga chantun il cas e perquai saja l'iniziativa giustifitgada, di Sepp Caluori, il president da Gastro Grischun.