Siglir tar il cuntegn

Header

cuntegn

En vista al 2023 Ir cun traffic public na vegn betg pli char

Era l’onn che vegn na duain ils pretschs per ils bigliets da bus e tren en general betg vegnir pli chars. Quai ha decis l’Alliance Swiss Pass, l’organisaziun da la branscha dal traffic public en Svizra.

Gia per la sisavla giada na vegnan l'onn che vegn ils pretschs per il traffic public betg augmentads. Uschia vulan ins cuntanscher in augment tar la dumonda per bus e tren. Malgrà la situaziun economica difficila hajan las organisaziuns commembras decis a favur da la clientella, scriva l'Alliance Swiss Pass en ina communicaziun.

La pandemia da corona haja er laschà enavos ses fastizs tar las interpresas da transport. Plinavant procurian era ils custs pli auts sin la fiera da carburant per in augment dals custs tar las interpresas dal traffic public sin via. Prioritad haja per l'allianza dentant il mument d'augmentar il dumber da passagiers e da gudagnar enavos clientas e clients che hajan guntgì il traffic public pervia da la pandemia. Cuntanscher quella finamira vul la branscha cun ina gronda campagna per viadis en il temp liber sco era cun in'offerta attractiva cun bigliets da pretsch reducì per gruppas u per colliaziuns singulas.

Medemamain hajan ins er reducì ils custs per il Swiss Travel Pass ed introducì ina carta dal di da respargn, sco er la midada da classa da respargn.

audio
Per tadlar: Curt e cumpact
ord RTR Audio dals 11.04.2022.
laschar ir. Durada: 1 minuta 7 Secundas.

RTR novitads 12:00

Artitgels legids il pli savens