Siglir tar il cuntegn

Header

cuntegn

Energia da vent Iniziativas duain proteger il guaud

Rodas da vent na duain betg pli vegnir construidas en guauds. Ultra da quai duai la populaziun stuair cundecider a l'urna davart projects d'energia da vent. Quai pretenda l'Associaziun Cuntrada libra Svizra. Ella ha perquai lantschà duas iniziativas dal pievel.

Il guaud saja d'impurtanza essenziala, betg be per la biodiversitad, mabain era per ils umans. En il num da la protecziun dal clima veglian ins ussa però lubir da runcar impurtant spazi natiral per construir là rodas da vent. L'Assoziaziun Cuntrada libra Svizra sa dosta cunter quests plans e lantscha in'iniziativa. L'iniziativa per la protecziun dal guaud pretenda in scumond da rodas da vent en guauds e sin pasgtiras da guaud. Il scumond vala per rodas da vent ch'èn pli autas che 30 meters. D'ina pastgira discurra l'Associaziun Cuntrada libra Svizra sche quella ha dapli che 80 plantas sin ina surfatscha gronda sco ina plazza da ballape. Il scumond duai plinavant valair aifer in radius da 150 meters enturn guauds e pastgiras.

Bayern
Legenda: Roda da vent a Bergtheim en Baviera Keystone

Rinforzar dretgs da la populaziun

La segund'iniziativa vul rinforzar ils dretgs democratics da la populaziun pertutgada da projects da rodas da vent. Tenor ils iniziants stoppian d'ina vart las vischnancas pertutgadas directamain approvar la construcziun da rodas da vent sche quellas sajan pli autas che 30 meters. Da tschella vart duai era la populaziun da vischnancas vischinas survegnir la pussaivladad da vuschar davart tals projects, sch'ils projects pertutgan las vischnancas.

Las iniziativas duain avair in effect retroactiv. Rodas da vent che vegnan bajegiadas suenter il prim da matg 2024, ston tut tenor vegnidas bajegiadas enavos.

L'Associaziun Cuntrada libra Svizra ha preschentà las duas iniziativas a chaschun d'ina conferenza da medias a Berna. Ils iniziants han ussa temp fin la fin da fanadur da l'auter onn da rimnar mintgamai 100'000 suttscripziuns.

Or da l'archiv: La roda da vent a Haldenstein è fin ussa l'unica en il Grischun. Ina segunda pudess producir energia per ulteriuras 2'000 chasadas.

video
Segunda roda da vent per Haldenstein
Or da Telesguard dals 07.03.2023.
laschar ir. Durada: 3 minutas 49 Secundas.

RTR novitads 12:00

Artitgels legids il pli savens