Ils parcs da vent sin il Gottard e sin il Nufenen han producì l'onn passà mo pauc forza electrica. Las ovras electricas dal Tessin (AET) che posseda 70% dal parc ha confermà ina producziun modesta da 10,8 uras gigawat (GWh) electricitad – quai che correspunda tenor ils adversaris ad in'effizienza da 10,5%.
Producziun modesta tras cundiziuns spezialas
La societad fa dentant valair ch'il 2021 saja stà in onn cun relativ pauc vent, e ch'il nov indriz haja lavurà pir a partir da l'atun cun capacitad cumplaina. Las cifras dals ultims mais dal 2021 correspundian numnadamain a las prognosas. Lezzas partevan d'ina producziun annuala da 16 fin 20 GWh.
Era tar il parc da vent sin il Nufenen quinta l'Associaziun svizra per ina politica d'energia raschunaivla «Freie Landschaft Schweiz» che l'effizienza muntia mo a 7,1%. Là argumenteschan ils adversaris che quai saja d'attribuir tranter auter al fatg che l'indriz è stà airi radund 1'000 uras en il rom da la protecziun d'utschels e d'utschels mezmieur.
Tenor adversaris ha la Svizra memia pauc vent
Per l'associaziun critica vers l'energia da vent mussan questas cifras che la Svizra n'haja betg avunda ressursas da vent per producir energia da moda effizienta ed en ina quantitad raschunaivla. Quai sper ils donns vid l'ambient er per convischins.
Tenor Confederaziun vegn producì exact il dretg mument
L'Uffizi federal per energia (BFE) percunter paisa in avantatg fitg grev: Ils parcs da vent produceschan l'electricitad surtut durant l'enviern. E quai saja exact il mument che la Svizra dovria era l'energia. Ultra da quai dettia mo lubientschas per tals parcs cun cundiziuns per la protecziun da l'ambient e la natira.
Tenor il program da promoziun federal «Energieschweiz» furnescha l'energia da vent fin ussa stgars 1% da l'electricitad che la Svizra dovra. Quai munta che la Svizra è a la cua da la tabella dals stadis da l'Europa.