Siglir tar il cuntegn

Header

Navigaziun

Traffic d'autos a Turitg.
Legenda: Il benzin ed diesel na duajan betg contribuir a la midada sin il sectur da l’energia. Keystone
cuntegn

Svizra Energia na duai betg vegnir pli chara

En Svizra na duai l’energia betg vegnir pli chara entras taxas directivas autas. La cumissiun per ambient, planisaziun dal territori ed energia dal Cussegl naziunal ha refusa la proposta dal Cussegl federal. Quai rapporta SRF sa referind a differentas funtaunas.

Il Cussegl federal vuleva introducir taxas directivas per spargnar energia. Uschia duai quai a partir dal 2021 la taxa da promoziun per las energias regenerablas sco energia fotovoltaica, idraulica ni da vent vegnir remplazzada cun ina taxas sin carburant e current electric.

Il sistem directiv è giud maisa

La cumissiun d’energia propona uss al Cussegl naziunal da betg entrar en la dumonda, quai senza cuntravusch, rapporta radio SRF sa referind sin pliras funtaunas. Uschia è il sistem directiv probabel giud maisa. Quest sistem cun taxas sin carburant ed il consum d’electricitad ed il rembursament da quellas a la populaziun e l’economia era ina part centrala da la strategia d’energia 2050 dal Cussegl federal.

Uss dovra quai alternativas

Sco quai che la cussegliera federala e parsura dal Departament d’energia Doris Leuthard ha ditg envers radio SRF stoppian ins uss elavurar alternativas. Il squitsch da temp na saja anc betg evidents. La realisaziun da l’emprima etappa saja planisada il 2035, ha ditg Leuthard a SRF.

Ils 21 da matg vegn il pievel a decider davart il referendum da la pps ed uschia sur da la realisaziun da l’emprima etappa da la strategia d’energia 2050.

RR novitads 07:00