Total ha la Confederaziun dumandà 750 interpresas da far part a questa enquista, 124 èn sa participadas. Quellas vegnan da differentas spartas dal sectur d'energia, numnadamain 113 firmas da rait, 79 gestiunaris da posts da mesiraziun e 54 producents d'electricitad (ina firma po il medem mument surpigliar pliras rollas al martgà). Ils resultats da la retschertga tar questas interpresas sajan en media «dischillusiunants», scriva l'Uffizi federal d'energia en in rapport davart la segirezza da cyber per la rait d'electricitad svizra.
Sin ina stgala da 0 enfin 4 hajan las interpresas d'electricitad cuntanschì en media ina valur cnap sut 1. Fitg schlettas sajan las firmas dad insumma percorscher in'attatga sco er tar la reacziun e cun lura puspè reconstruir la rait suenter in incap. Lev meglier guardia quai or tar la prevenziun.
Mesiras e quai svelt
Il rapport da la Confederaziun pretenda a moda svelta cundiziuns da basa per la segirezza da cyber en la branscha d'electricitad. Plinavant duain vegnir etablidas in'autoritad da controlla ed in sistem per rapportar incaps. En ils pajais vischins stettia, tenor il rapport, in bun tant meglier quai che pertutga la segirezza d'attatgas da cyber. Bleras mesiras che vegnan actualmain discutadas en Svizra, sajan gia etablidas là.