A partir dal fanadur 2022 valan plirs implants solars ordaifer da la zona da bajegiar sco stabiliments liads al lieu. Quai vul dir, che da quels projects survegnian pli spert ina lubientscha. I va per exempel implants solars vid fatschadas, mirs da fermada u paraids cunter canera en territoris agriculs pauc sensibels, sco er per implants solars che nodan sin lais da fermada en territoris alpins. Plinavant ha il Cussegl federal schluccà las cundiziuns per implants solars sin tetgs. Per bajegiar quels na duai en il futur betg pli duvrar ina lubientscha.
Discussiuns davart obligatori d'implants solars
Sch'i vegn construì ina chasa nova, lura duai er vegnir construì in implant solar sin quella. I duai dar mo paucas excepziuns, per exempel sch’i va per il maletg dal vitg. Quai saja l’idea da la Cussegliera federala Simonetta Sommaruga, ha rapportà la «Schweiz am Sonntag» il schaner passà. La gasetta è latiers sa referida sin documents dal Cussegl federal.
Avant aveva gia l'associaziun dal fatg «Swissolar» pretendì in obligatori d'implants solars. Els han fatg allusiun che 18 chantuns hajan gia in uschenumnà «obligatori da producir atgna energia per chasas novas». L'associaziun dals patruns da chasas ha crititgà l'idea. Il sistem da promoziun actual bastia.
