La Svizra fissia pertutgada fermamain da stretgas en il provediment cun gas en l'Europa. Il Cussegl federal sa prepara per in'eventuala la situaziun da mancanza – quai en collavuraziun cun ils chantuns e las branschas pertutgadas.
Actualmain tanschi – però poi vegnir fitg stretg
Per il mument funcziunia il provediment cun energia a curta vesta bain. La situaziun saja però s'accentuada las ultimas emnas, uschia ch'il Cussegl federal stoppia sa preparar, ha ditg Simonetta Sommaruga avant las medias.
La Svizra dovria mintg'onn en media gas per 35 uras terawatt. Da questas 30 durant l'enviern, uschia ch'ins stoppia sa preparar surtut per l'enviern, ha ditg il cusseglier dals stans Martin Schmid (PLD/GR) e commember da la cumissiun per ambient, planisaziun ed energia dal Cussegl dals chantuns e president da l'associaziun svizra da l'industria da gas.
Sa preparar per l'enviern: Crear reservas da gas
En egl ha il Cussegl federal surtut il provediment cun gas, perquai che la Svizra n'haja nagins reservuars da gas e dependa uschia dals imports. E quai en in ambient, nua ch'il provediment cun gas è periclità.
La finamira saja da cumprar gas en la quantitad da 6 uras terawatt en l‘exteriur, plus opziuns sin ulteriuras 6 uras terrawatt. Ultra da quai duain implants d‘industria che pon midar da gas sin ieli da stgaudar, quai che spargnia prest 6 uras terrawatt.
Appel da spargnar gas
Il cusseglier federal Guy Parmelin ha declerà ch'i pudessia malgrà questas mesiras sut tschertas cundiziuns esser necessari da contingentar il gas. Ultra da quai ha'l appellà a l'industria ed a las administraziuns da chasas da reducir il consum da gas.