Siglir tar il cuntegn

Header

purtret da las cellas solaras sut il culm.
Legenda: L'implant solar Calinis gist sut il grip a Favugn ch'è vegnì inaugurà la stad passada. RTR, Linus Livers
cuntegn

Energia Sulegl e vent or da la muntogna pussibilitescha energia verda

Per cuntanscher ina maximala neutralitad da CO2 duai la Svizra promover energia da sulegl e vent en las muntognas. Quai din perscrutaders da l'ETH a Losanna e da l'Institut per perscrutaziun da naiv e lavinas a Tavau. Tenor il studi fiss il scenari optimal 75% forza da vent e 25% energia solara per cumplettar il provediment actual da forza idraulica.

Per il studi han ils scienziads sviluppà ina metoda per visualisar differents scenaris, co ch'ins pudess realisar il mix d'electricitad a moda neutrala al clima ed independent da l'exteriur.

Muntogna sulegliva e cun bler vent

Il scenari optimal mussa uschia ina cumpart auta d'energia da vent en regiuns muntagnardas, nua ch'il vent buffa ferm. Surtut en il Giura datti tenor quest model anc bler potenzial. 40% da las installaziuns cussegliadas crodan uschia sin quella regiun. Suenter vegnan las Alps e las Prealps.

Energia solara è uschia attractiva surtut en las Alps ed haja là er schanzas da render. L'enviern datti là numnadamain er bler sulegl, ha declerà Michael Lehning dal SLF. Plinavant pudessan ins nizzegiar la rait existenta, che vegn il mument surtut spisgentada cun energia idraulica, per purtar l'energia en la Bassa. Uschia pudess ins reducir la dependenza dals pajais vischins per 80%.

D'installar massadas moduls solars sin ils tetgs da las citads, fetschia pauc senn, damai ch'il sulegl dettia memia pauc savens durant l'enviern.

Scenari provocant

Cun ina collavuraziun intelligenta tranter energia solara e da vent sco er idraulica, na stoppian ins tenor ils perscrutaders betg duvrar deposits supplementars stagiunals. Plinavant vegnia la Svizra pli independenta da l'exteriur, en spezial en temp nua ch'er ils vischins han gì da ponderar lur surproducziun u lur deficits.

Il studi è vegnì sustegnì dal Fond naziunal svizzer e da l'Uffizi federal per energia.

RTR novitads 09:00

Artitgels legids il pli savens

Scrollar a sanestra Scrollar a dretga