Tar l'armada svizra èn vegnidas annunziadas l'onn passà 96 armas sco sparidas. Quai sajan quasi medem bleras sco ils onns avant. 95 armas hajan las commembras ed ils commembers da l'armada annunzià sco enguladas, ina saja vegnida destruida tar in incendi, communitgescha l'armada. 20 armas sajan plinavant puspè vegnidas nanavant.
Tant tar quellas sco er tar las sparidas sa tractia surtut da schluppets d'assagl 90 (82 sparids) u da pistolas (13 sparidas). L'Armada svizra fetschia tut il pussaivel per evitar talas perditas, pertge che mintga arma sparida saja ina da memia, ha declerà il pledader da l'armada Stefan Hofer envers SRF. L'armada emprovia da sensibilisar la schuldada per il tema per exempel cun fegls d'infurmaziuns. La perdita da l'arma en il temp privat saja in cas per la giustia militara, persunas possian vegnir chastiadas cun multas u cunzunt privaziun da la libertad.