Ina runda d'experts da la Confederaziun ha infurmà davart il stan actual en il cumbat cunter il coronavirus en Svizra:
- Var in quart dals novs cas vegn importà da l'exteriur, di Stefan Kuster dal BAG. Ins vegnia en futur a far provas da controlla, per guardar che persunas che turnan da pajais ch’èn sin la glista da ristg suondian la quarantina da diesch dis.
- Il dumber da las novas infecziuns è creschì las ultimas 24 uras per 88 en Svizra ed il Principadi da Liechtenstein. Kuster spera che las infecziuns sa stabiliseschan sin quest livel.
- Dapi ils 25 da zercladur pon ins telechargiar la SwissCovid-App. Fin uss è l'app activada sin 1'017'504 telefonins (stan mesemna).
88 cas novs da corona
Il dumber da las novas infecziuns è creschì las ultimas 24 uras per 88 en Svizra ed il Principadi da Liechtenstein. Mesemna ha l'Uffizi federal da sanadad annunzià 129 cas novs, il mardi 54. Ils ultims trais dis da l'emna passada era il dumber da cas novs novs mintgamai sur 100. Il dumber da persunas che èn mortas pervi dal virus è restà tar 1'686.
Importà da l'exteriur
Infecziuns dettia il mument cunzunt en ils chantuns gronds, sco Turitg, Argovia u Vad. E quai cunzunt en clubs, ma er tar eveniments sco sepulturas u a la plazza da lavur, ha Stefan Kuster dal BAG ditg a la conferenza da medias. Las bleras infecziuns capitian là, nua che grondas gruppas da persunas s'inscuntrian. Ed in quart dals novs cas vegnia importà da l'exteriur.