Siglir tar il cuntegn

Header

cuntegn

Enviern 2022/23 Malgrà grondas sfidas, bunas prognosas

Er sche la pandemia na fatschenta strusch pli las pendicularas Svizras ed il turissem d'enviern, datti dentant era quest enviern grondas sfidas cun la midada dal clima e la crisa d'energia. Svizra Turissem è tuttina optimistic e quinta perfin cun ina meglra stagiun ch'anc avant la pandemia.

Svizra Turissem quinta questa stagiun cun 1% dapli pernottaziuns en las destinaziuns da muntogna en congual cun la stagiun 2018/19. Cunzunt vegn quintà cun dapli giasts indigens. Là è la prognosa tar in plus da 14% envers l'onn avant la pandemia. Dentant hajan las pernottaziuns da Svizzers e Svizras cuntanschì durant corona il zenit ed ì vegnan uschia a sa sminuir per 6% cumpareglià cun la davosa stagiun. Persuenter duess i dar in plus envers la davosa stagiun tar ils giasts dad auters pajais, là vegn quintà cun in plus da 18%.

Grondas sfidas era quest enviern

Tenor Svizra Turissem sajan questas prognosas cunzunt legraivlas sut las circumstanzas actualas che la branscha da turissem stoppia superar. Cunzunt la pussaivla mancanza d'energia saja il grond factur che procura per malsegirtad. Latiers vegnan ils auts custs d'energia.

Era la situaziun economica cun il ferm franc svizzer, l'inflaziun ed il privel dad ina recensiun en impurtants pajais en l'Europa e l'America danunder ch'ils giasts vegnan tutgia la branscha. In ulteriura sfida è la midada dal clima, che maina tar ina pli curta stagiun ed autras premissas midadas.

Pendicularas da buna speranza e prontas per la crisa

Era la branscha guarda cun optimissem envers la stagiun d'enviern, uschia las Pendicularas Svizras. Ins saja pronts sin in'eventuala mancanza d'energia e haja elavurà in plan da 90 mesiras da spargnar sche necessari. Tranter auter vegniss lura il tempo da las pendicularas e sutgeras adattà, la purschida en general vegniss limitada e las temperaturas en ils indriz sbassadas. La branscha veglia era nizzegiar questa crisa per optimar il niz d'energia e tschertgar schliaziuns da producziun.

RTR novitads 12:00

Artitgels legids il pli savens

Scrollar a sanestra Scrollar a dretga