Els tutgan tar la primavaira sco la strucca da fain: ils raischens. Els spetgan sin pastgs e chaglias enfin ch'els sa pon pender vi d'in animal u in uman e la finala piztgar els. Il parasit cun otg chommas è per bleras e blers ina sgarschur cun quai ch'els pon infectar nus cun differentas malsognas, sco per exempel Borreliosa ni l’inflammaziun dil tscharvè FSME.
Normalmain n’èn ils raischens betg activs durant l’enviern. Auter era quai questa stagiun, raquinta il medi da lavur, Felix Ineichen, envers SRF:
Ins na po betg pli dir: «L’enviern avain nus ruaus». I dat uss era l’enviern piztgadas.
In enviern chaud è la culpa
Era sch'ins dat in'egliada sin la charta da raischens, ch'ins po chargiar giu sin il telefonin, vesan ins, che bleras regiuns èn gia pertutgadas. Sulet en il schaner haja dà en Svizra 20 annunzias da piztgadas da raischens.
Ils raischens vegnan activs davent da 7 – 8 grads. E quella temperatura avain nus quest enviern cuntanschì pliras giadas.
Ina virola ch’è vegnida main populara
Encunter ina da las malsognas, numnadamain FSME, datti ina virola. Enfin il 2019 han mintg'onn dapli persunas laschà virolar encunter. Dapi lura van las cifras dentant puspè enavos. Tenor l'associaziun dad apotecas svizra, dettia perquai differentas raschuns, sco la presidenta Martine Ruggli di envers SRF. Per l’ina haja la vaccinaziun da corona laschà ir en emblidanza in zichel la virola encunter raischens e per l’autra stoppian ins laschar virola encunter raischens l’enviern, e tgi che ha manchentà quai, spetga in onn.
Mesiras da protecziun
Uschia saja tant pli impurtant da sa tegnair vi da las mesiras da segirtad. Pia sch’ins va en il guaud, trair en vestgadira lunga, metter las chautschas en las soccas e tschertgar raischen vi dal corp suenter la spassegiada – e quai davent dad immediat.
Adattà al tema
