Er en il futur vegn il numerus clausus a decider

Il test da qualificaziun per pudair far in studi da medischina na vegn betg remplazzà entras in praticum. Il Cussegl dals chantuns ha decidì ch'in tal praticum na saja betg nizzaivel e na fetschia er betg senn.

Um che scriva in test. Bild in Lightbox öffnen.

Legenda da maletgs: Il test da qualificaziun na vegn betg remplazà entras in praticum. (maletg simbolic) Keystone

La maioritad dal Cussegl naziunal aveva approvà la moziun da Ruth Humbel (PCD) da remplazzar il test da qualificaziun per il studi da medischina entras in praticum. Cun l'argument ch'ins sappia entras il numerus clausus mo eruir limitadamain sch'ina persuna saja adattada per la professiun da medi. Las capacitads intellectualas sajan gia examinadas entras la maturitad. Perquai duai il test da qualificaziun examinar la pratica.

4'000 praticums ad onn na sappian ins betg procurar

La chombra pitschna ha dentant refusà la moziun la mesemna. Per motivs finanzials ed organisatorics na saja strusch pussaivel da procurar per avunda plazzas da praticum, ha la pledadra da la cumissiun Brigitte Häberli-Koller (PCD) argumentà. Plinavant saja la selecziun da students chaussa dals chantuns.

Era il cusseglier federal dal departament pertutgà Johann Schneider-Amann aveva cusseglià da refusar la moziun. In praticum na saja nagina garanzia per megliers medis. I na saja er betg pussaivel da procurar mintg'onn per 4'000 plazzas da praticum.

RR novitads 10:00