Il favrer 2007 ha la Svizra decidì las sancziuns cunter l'Iran sin fundament d'ina resoluziun dal cussegl da segirtad da l'ONU. Il president da l'Iran, Hassan Ruhani, beneventa che las sancziuns internaziunalas èn abolidas. Uschia haja cumenzà in nov chapitel da las relaziuns tranter l'Iran e la cuminanza internaziunala ha ditg Ruhani avant il parlament. Lur economia haja uss novas schanzas.
John Kerry e Federica Mogherini han declerà la fin da las sancziuns
Il minister da l'exteriur american John Kerry e l'incumbensada per l'exteriur da l'Uniun europeica Federica Mogherini han declerà ier saira, d'avair instradà ils pass correspundents.
Curt avant aveva l'Agentura internaziunala da l'energia nucleara IAEA attestà a l'Iran, ch'il pajais haja ademplì tut las obligaziuns da la cunvegna chattada il fanadur passà a Vienna.
La ONU lauda, l'Israel crititgescha
La realisaziun da la cunvegna d'atom è per il secretari general da l'ONU Ban Ki Moon in mument decisiv. Uschia sa mussia la buna voluntad da tut las partidas involvidas, ha Ban ditg a New York.
Betg cuntent che las sancziuns èn abolidas è l'Israel. Il primminister Benjamin Netanjahu ha avertì, che l'Iran vegnia a cuntinuar a destabilisar il Proxim Orient ed a derasar il terrorissem sin l'entir mund.
RR Novitads 06:00/12:00