Eritreans giuvens ed Eritreanas giuvnas n'han nagina schelta. Els ston far lavur cumina en lur pajais. Quant lung che questa lavur cuzza na san els betg. En media tranter 5 fin 10 onns. Els èn exposts a lur uffiziers e vegnan restrenschids en lur cardientscha. Dunnas ston plinavant temair abus sexual da lur superiurs.
Detagls enconuschan paucs
Ils fatgs davart la lavur cumina en Eritrea n'èn betg clers. Organisaziuns da dretgs umans n'èn betg giavischadas en il pajais. Infurmaziuns datti perquai prest be dad Eritreans ch'èn fugids. Lur diaspora discurra da sclavaria statala.
Er il Tribunal administrativ federal ha a disposiziun be paucas infurmaziuns segiradas. Dasper rapports da l'ONU e da la giustia britannica han els era stuì sa basar sin rapports da medias e films documentars.
RR novitads 16:00