L'eroport da Turitg spetga sur l'emna da Nadal radund 34'000 passagieras e passagiers per di, ha ditg ina pledadra dal eroport envers l'agentura da novitads Keystone-SDA. Il 2020 eran quai anc 17'000 persunas. Ma en cumparegliaziun cun il 2019, pia avant la pandemia, è il dumber tuttina relativamain bass. Alura aveva l'eroport dumbrà 85'000 persunas per di.
Dapi ch'ins sappia da la varianta dad Omicron regia gronda malsegirtad. Las novas restricziuns hajan effectuà che blers viadis sajan vegnids annulads u spustads.
Medema situaziun a Basilea e Genevra
L'eroport Basilea Mulhouse quinta cun in plus da 40% cumpareglià cun il 2020 ed era l'eroport da Genevra quinta cun pli paucs passagiers. Genevra quinta cun radund 25'000 passagiers per ils 24 e durant ils dis da festa ils 25 e 26 cun radund 18'000 persunas.
Er ils sgols cun giasts or da la Gronda Britannia che vegnan gugent per ir cun skis en Svizra, èn mo utilisads per 35 fin 38%.
