Siglir tar il cuntegn
Inhalt

Svizra Erwin Sperisen per la terza giada avant dretgira

Suenter ch'il Tribunal federal ha abolì la sentenzia pervi da murdraretsch en plirs cas sto l'anteriur schef da polizia da la Guatemala sa responsar danovamain avant la dretgira a Genevra.

purtret da Erwin Sperisen
Legenda: Nov process cunter il burgais dubel ed anteriur schef da polizia da la Guatemala. Keystone

A Sperisen vegn renfatschà d'avair sajettà giu praschuniers. Il settember 2006 è Sperisen i ensemen cun auters policists en ina praschuna a Guatemala-citad. Per part avevan praschuniers surpiglià la controlla da la praschun. Tar l'incap è morts set praschuniers. A Sperisen vegn renfatschà d'avair cumandà ils murdraretschs.

El sa dosta cunter las renfatschas

Vitiers haja Sperisen cumandà a ses umens da zuppentar quests murdraretschs cun plazzar enturn las baras e da metter ad els en maun armas. Sperisen refusa quai. II Tribunal federal ha abolì la sentenzia da la giustia genevrina, tranter auter perquai ch'intgins dretgs da Sperisen èn vegnids violads.

Novas perditgas

Vitiers ha il Tribunal federal ditg ch'intgins dals mussaments sajan arbitrars. Tar il nov process duain er novas perditgas vegnir a pled.

Sperisen stat avant dretgira a Genevra perquai ch'el è scappà en Svizra. Il 2012 è el vegnÌ arrestà a Genevra. Perquai ch'el posseda er in passaport svizzer na po Sperisen betg vegnir excludÌ en la Guatemala.

RR novitads 11:30