Siglir tar il cuntegn

Header

la chantadura Conchita Wurst, ella chanta
Legenda: Conchita Wurst, ella (ni el) ha survegnì puncts da blers ed ha uschia gudagnà l'onn passà l'ESC. Keystone
cuntegn

Svizra ESC: tgi dat puncts a tgi

Tar l'Eurovision Song Contest ESC giogan er facturs politics ina rolla tar la surdada dals puncts. Uschia per exempel conflicts e guerras, la situaziun finanziala dad in pajais, la regiun u er la migraziun. In dals exempels ils pli enconuschents è il cass tranter la Georgia e la Russia l' onn 2009.

Là ha l'ESC gì lieu a Moscau. In onn avant ha la Georgia gì la guerra dal Caucasus cunter la Russia. Al song contest leva ella ir cun il titel "We do not wanna put in". In tetel provocativ cunter il president russ Wladimir Putin. La Georgia avess stuì midar il titel, è lura dentant saretratga da la concurrenza. Quai n'è betg stà la suletta giada, che dus pajais na vulevan betg parter ina tribuna ina cun l'autra.
In auter exempel enconuschent nua ch'il contest vegn nizzegià per reparter statements politics: Suenter la curdada dal mir a Berlin ha l'Austria per exempel chantà da "no more walls", la Germania sezza da "frei zu leben".

Conflicts actuals sa mussan

Er quest onn sa reflecteschan ils conflicts europeics en il song contest. L'Ucraina na pren betg part pervi dal conflict cun la Russia. In auter exempel actual per tempras politicas en l' ESC: La Franschta patratga vid il giubileum 70 onns dapi la segunda guerra mundiala cun il tetel "n'oubliez pas".

Allianzas tranter vaschins

In ulteriur motiv da surdar puncts è la regiun. Peter Ramon Baumann è vizepresident dal Eurovision Club Switzerland e sa, co il ritual annual ESC funcziunescha. El è stà a mintga song contest dapi l'onn 1982. Pajais che dattan quasi adina "twelve points" ina a l'autra èn la Cipra e la Grezia, ils pajais scandinavs Svezia, Norvegia, Islanda e Danemarc ni era il Balticum anc ensemen cun la Finlanda e l'Ungaria. Tranter la Svizra, la Germania e l'Austria na dettia dentant nagina ina tala allianza, malgrà il linguatg communabel, uschia di Baumann. Er dependia dal dumber da migrants en in pajais, lez telefoneschian bler per lur pajais d'origin. Perquai surdettia la Germania mintg' onn relativamein blers puncts a la Tirchia.

Sper ils facturs politics dependia natiralmain era dal gust da musica, la chanzun che gudognia stoppia numnadamain er esser in bun song, uschia Baumann.

Artitgels legids il pli savens

Scrollar a sanestra Scrollar a dretga