Las relaziuns tranter la Svizra e la Tunesia èn s'intensivadas dapi la revoluziun avant 5 onns. La revolta cunter il president ed autocrat Ben Ali è stada la sbrinzla che ha dà fieu als moviments da protesta ed al cumbat per la libertad en auters stadis arabs. Quai che ha lura manà a la primavaira araba.
Sin viadi ad ina democrazia
Cun la visita uffiziala veglia la Svizra era renconuscher ils pass che la populaziun tunesiana ha fatg ils davos onns en direcziun da dapli democrazia e legalitad, di il Cusseglier federal Didier Burkhalter. La Confederaziun veglia gidar la Tunesia da cuntinuar quella via che na saja betg simpla: «Nus avain investì bler en l’agid economic ed en las dumondas da la migraziun e nus vulain cuntinuar cun quai.»
Daners bloccads da l'anteriur president
En il center dals discurs vegnan perquai era a star ulteriurs pass envers la democratisaziun da la Tunesia, il cumbat cunter il terrorissem, ils programs da sustegn da la Confederaziun sco era las relaziuns economicas. En quai connex vegn era discutà davart la restituziun dals daners che l'anteriur president Ben Ali ha laschà transferir en Svizra e che la Confederaziun ha bloccà.
Tenor il minister da l’exteriur svizzer duvrassi uss cleras decisiuns da las dretgiras tunesianas ch’ils daners sajan vegnids engulads dal pievel tunesian. Mo uschia saja pussaivel da far in pass enavant. La Svizra haja grond interess da pudair terminar quella procedura.
Dar ina perspectiva als giuvens
In auter punct nua ch'i dovria in svilup saja la migraziun. I saja necessari da dar als giuvens en Tunesia ina perspectiva, di Cusseglier federal Burkhalter. E quai muntia en emprima lingia da crear e mantegnair plazzas da lavur.
«Nus na dastgain betg emblidar che la revoluziun en Tunesia è naschida pervia da la mancanza da perspectivas per ils giuvens. Perquai stuain nus far tut il pussaivel da tegnair las giuvnas ed ils giuvens en il pajais.»
Ulteriur program da la visita uffiziala
Ils discurs han lieu oz suentermezdi. La saira envida il Cussegl federal ad ina tschaina da gala per onur dal president Béji Caïd Essebsi. Il venderdi s'entaupa la delegaziun da la Tunesia cun represchentants da l'economia svizra ed avant il sgol enavos fan els anc visita ad in'interpresa el conturn da Berna.