Siglir tar il cuntegn

Svizra ETH cun nov record da students e doctorants

L'onn passà èn uschè blers students sco anc mai stads immatriculads a las duas scolas politecnicas federalas a Turitg e Losanna.

Students en la ETH a Turitg.
Legenda: Record da students a la ETH a Turitg. Keystone

L'onn 2017 eran 31'293 students e doctorants immatriculads en ina da las duas scolas da l'ETH. Cumpareglià cun l'onn avant èn quai milli dapli – cumpareglià cun avant 10 onns schizunt 10'000 dapli. Quai communitgescha il Cussegl da las scolas politecnicas federalas.

Il pli grond augment hai dà sin il sectur da l'informatica (+7,5%) e la scienza d'inschigner (+4,1%). 2017 han 6'925 persunas fatg il bachelor, il master u il doctorat (2016: 6'745).

Adina dapli dunnas

La quota da dunnas che studegian a l’ETH è medemamain s’augmentada levet sin 30,6% (2016: 30%). Tar ils collavuraturs munta la quota a 34%. (2016: 33,6%). Tar las professuras saja ella pli bassa cun 14,9% (2016: 13,9%). Dentant dettia era qua ina midada da trend: L'onn passà sajan numnadamain bunamain 30% dunnas vegnidas nominadas sco novas professuressas. Cun quai quintan las Scolas politecnicas che la quota da dunnas crescha ils proxims onns era en quest sectur.

Las Scolas politecnicas federalas tutgan tar las meglras dal mund. Sias instituziuns èn partenaris fitg dumandads en il transfer da scienza e da tecnologia. Il 2017 han ellas fatg varga 500 novs contracts da collavuraziun cun l'economia privata.

RR novitads 11:00